HI all, this is what i gave it to her on her birthday

Kabhi surya ki pehli kiran me
kabhi sehar ki ruphali roshni me
uska aks dikhai deta hai
kabhi kabhi – band aankhon se bhi
uski maujoodagi ka ehsaas hota hai

Wo sabse pehle uthakar
sabse baad me sone wali aankhon me
kabhi mamta ka gagar
kabhi krodh me lipt apar prem
aur kabhi meri safalta par
hansi ke bajaye
aankhon me namkeen pani dikhayi deta hai
kabhi kabhi – band aankhon se bhi
uski maujoodagi ka ehsaas hota hai

Kabhi meri chinta me uski bhauhon ki silvatein
kabhi meri galti pe uski aankhon ki tarer
aur kabhi meri nadaani par
uske dil ka sukoon dikhayi deta hai
kabhi kabhi – band aankhon se bhi
uski maujoodagi ka ehsaas hota hai

Wo mere result ke din mujhse jyaada
 uske dil me dhak dhak hona
fir bhi chupchap baithkar mera hausala badhana
wo meri exams ke dino me
mere saath saath jagna aur
mujhe jagane ke liye mujhse aadha ghanta jaldi uthna
wo uska mere liye ghanto bhagwan se prarthana karna
aur tarakki pe matha choomna
tab uski aankhon me vatsalya dikhayi deta hai
kabhi kabhi – band aankhon se bhi
uski maujoodagi ka ehsaas hota hai

Kabhi meri har ichcha ko sar-aankhon pe bithana
kabhi kisi badtameezee pe fatkaar sunana
kabhi – daantne ke baad zor se gale lagana
aur kabhi – samajhdari pe uska garv se bhar jana dikhayi deta hai
kabhi kabhi – band aankhon se bhi
uski maujoodagi ka ehsaas hota hai

Kabhi – mere masoom sawalon ke hazaar dafe jawaab dena
kabhi meri ek pukar par sare kaam chod mere pass aana
aur kabhi mujhe lori sunane ke baad , chain se sota dekhna , dikhayi deta hai
kabhi kabhi – band aankhon se bhi
uski maujoodagi ka ehsaas hota hai

Wo mere sahi hone par kisi se bhi lad lena
aur mere galat hone par zabardast tamacha lagana
wo meri chot pe nurse se bhi achche se marhum lagana
wo meri karah par uske dil me tees uthna
mere makam par pahunchne pe ,
uska bhagwan ko shukriya ada karna dikhayi deta hai
kabhi kabhi – band aankhon se bhi
uski maujoodagi ka ehsaas hota hai

Kabhi surya ki pehli kiran me
kabhi sehar ki ruphali roshni me
uska aks dikhayi deta hai
kabhi kabhi – band aankhon se bhi
uski maujoodagi ka ehsaas hota hai