For Bihar victims

Hunh, aaj fir wahi subah hai , kal jaisi hi
bistar ki jagah geeli zameen hai , kal jaisi hi

aaspass mere, rote bilakhte bachche hain
kiske hain , na kisi ko khabar hai
kaise hain , na kisi ko parwaah
paani me khelte the jo din raat
paani masti ka zariya tha jinke liye
aaj, unhe paani se nafrat hai

bhookh mar gayi hai har kisi ki
bhooke reh reh ke itne dino se
aansu pee – pee ke jee rahe hain wo
jinke sabzi khane me the nakkhre

har taraf paani hi paani hai mere
peene ko ek bhi boond nahi
kal tak zindagi pyaari thi jinko
aaj, unhe jeene ki chaah nahi

aasmaan se jab kabhi
girti hain anaaj ki boriyan
paise jaydaad ke liye lade nahi jo aaj tak
ladte hain do waqt todne ko rotiyan

ujad gaye sab gaanv
dheh isse saare ghar gaye
bichad gaye maa-baap se bachche
parivaar sabke bikhar gaye

kuch vidhvaa ho gayin
kuch anaath ho gaye
kuch kismat se bach nikle
kuch paani me samaa gaye

ujade shahar basaane me waqt nahi lagta
bikhre ghar sametne se jyaada
unko zarurat hai abhi humaari
hum sabse jyaada
unko zarurat hai humaari
hum sabse jyaada

 

insaan ki kami hai

shehron ki is laakhon ki bheed me insaan ki kami hai
aadmi anginat hai lekin insaan ki kami hai

har ek ke man me dvesh hai har kisi ke liye
tees uthti hai unnati se dusron ki, irshya pratyek se hai
adchane bahut hain zindagi ki raah me , sahaaron ki kami hai
aadmi anginat hain lekin insaan ki kami hai

padosi ko nahi khabar ab padosi ki hai
gali ke ek chor pe janaaza, doosre pe shaadi kisi ki hai
na dil ka vaasta kisi se, rishton me jazbaat ki kami hai
aadmi anginat hain lekin insaan ki kami hai

kar bhala ho bhala ko maanta ab koi nahi
dusron ko neecha dikha kar khud ko uthane me sabki hod si hai
buraai ka dabdaba zamaane me bhalaayi ki kami hai
aadmi anginat hain lekin insaan ki kami hai

alhad hasii masoom ki, dikhti nahi kisiko
din dahaade maar kaat sab mook dekhte hain
nigaahein sabke paas hain , nazar ki kami hai
aadmi anginat hain lekin insaan ki kami hai

dil se awaaz nahi , ab cheekh sunaayi deti hai
kyun badal raha hai khuda ka karishma ?
kyun gayab ho raha hai insaan hi insaan me se ?
kyun zindagi ki raahon me shaaron ki kami hai ?
kyun rishton me jazbaat ki kami hai ?
kyun zamaane me bhalaayi ki kami hai ?
kyun … ???
kyun aadmi anginat hain , insaan ki kami hai ?

allah ki nemat hai insaan ho pana
ie samhale rakhna hi imtehaan aadmi ki hai
ye samjhane walon ki nahi , samajhne walon ki kami hai
aadmi anginat hain lekin insaan ki kami hai
shehron ki is bheed me insaan ki kami hai
aadmi anginat hain lekin iinsaan ki kami hai

 

Main dvandva me hu – II

main dvandva me hu
khud se ladta, jhagadta
khud hi khud ko marhum lagata
main ik jang me hu
main dvandva me hu

ye dil hai kisi ka, ki mehez surkh deewarein hain
fir raha hu , har kisi se poochta hua
ye dar-o-deewar kis ke hain ?
main rehta kis ghar me hu ?
main dvandva me hu

ja-baja mubtila rehne ki koshish ki bahut
yaddasht me vaakaye kaundh hi jaate hain, uske saath ke
path-bhrashth hona chahta nahi, aur taye ye kar pata nahi
kya main sahi path pe hu ?
main dvandva me hu

dil me bahut sii baatein hain kehne ki usse
jazbaat ke sailaab umad rahe hain ek darwaaze ke peeche
chaabi mujhe mili nahi , ki chaabhi mujhse kho gayi
kholun to kholun kaise, is darwaaze ke taale ko ?
main sakht mushkil me hu , main badi mushkil me hu
main dvandva me hu
main dvandva me hu
khud hi khud ko marhum lagata hua
main ik jang me hu
main dvandva me hu

 

Main dvandva me hu – I

main dvandva me hu
khud se ladta , jhagadta
khud hi khud ko marhum lagata
main ek jang me hu
main dvandva me hu

kuch waqt ne , kuch zamaane ne
badal diya meri shaksiyat ko
tehreef karta hua mujaahiron se sabki
main apni hi khoj me hu
main dvandva me hu

kaun dost hai mera ? kaun dushman nira hai ??
main kiska wafadaar hu, kaun mera hai ?
in sawaalon se ghira hua
main jawaabon ki chah me hu
main dvandva me hu

chah kar bhi kuch achcha na hi saka mujhse
galat hi galat hua, sahi ho na saka mujhse
dil dukhaya sabhi chahne walon ka apne
kya main chata ki unke kaabil hu ?
main dvandva me hu

 

beetey dino kii

yaad aati hai us jaan-e-jigar kii
bichad gayi jo zamane ki bheed me
reh reh ke uthti hai kasak
tazaa hoti hain jab raatein beetey dino kii

kabhi maloom na tha
bichad jayenge main aur tum, kuch is tarah
teri khushboo aati hai, galiyon se aaj bhii
tazaa hoti hian jabb raatein beetey dino kii

khwaabon me aa aa ke
raatein meri tumne barbaad kar dii
milne ki chaah jaag uthti hai fir se
tazaa hoti hain jabb raatein beetey dino kii

khuda mehfooz rakhe mujhe
tere aks ki maujoodagi se
main , main nahi reh pata
tazaa hoti hai jabb raatein beetey dino kii

teri hasii, teri baatein, adaayein wo terii
tera roothna, mera manana
tera hasna, mera hasana, yaad aata hai bahut
tazaa hoti hain jabb raatein beetey dino kii

main bataa na sakunga tujhe, mere dil ke raaz
aankhon me teri tasweer liye ghoomta hu
tere deedar ke liye chod jaati hai mujhe, rooh meri
tazaa hoti hain jabb raatein beetey dino kii

jism se nahi, zeheno-dil se chaha hai maine tujhe
shaq ho gar, to aazma ke dekh lena
marta hu pal pal, bhatakta hu teri hi galiyon me
gor me meri jhaank ke dekh lena
saansein tairti hain meri, teri khushboo ki tarah hii
tazaa hoti hain jabb raatein beetey dino kii
reh reh ke uthti hai kasak
tazaa hoti hain jabb raatein beetey dino kii
yaad aati hai us jaan-e-jigar kii
tazaa hoti hain jabb raatein beetey dino kii

 

mere aks hote hain

tassavur jab mera
tujhe choo kar ke aata hai
aankhon ki mehfil hoti hai
dil me urs hote hain
bagal me tumhare
mere aks hote hain

teri banoor muskurahat ke sadke me
shajar se gulzaar jhadte hain
jaao kahin bhi
bach ke jaaoge kahan
aashiq se, deewane se apne
har koi jahan me harsu
tumhare mureed hote hain

teri yaad ke saaye me
shaame meri mehekti hain
suabhein roshan hoti hain
tere he tassavur se
aalam kuch yun sajta hai
tere shauk ka mujh par
ki raaton ki tanhaiyon me bhi
khwaab tumhare hi hote hain

taaron ke us paar
naksh dikhata hai tera , mujhe har raat
kehta hu apne dil ki baatein
saari usi se main
kaise bataun tujhe main
dil darta hai inkaar se
tujhse kaise kahun ?
bagal me tumhare
mere aks hote hain
har koi jahan me harsu
tumhare mureed hote hain
raaton ki tanhaiyon me
khwaab tumhaare hi hote hain
bagal me tumhare
mere aks hote hain